а) Диалог «Кыргыз тили сабагында» 

- КРдин Герби качан кабыл алынган?

- 1994-жылдын 14-январында.

- Гербдин авторлорун билесиңби?

- Албетте, билем. Авторлору: А. Абдраев менен С. Дубанаев.

- Гербде кандай жазуулар бар?

- «Кыргыз Республикасы» деген жазуусу бар.

- Анда эмненин сүрөттөрү тартылган?

- Ала-Тоонун, көлдүн жана күндүн сүрөттөрү.

- Эркиндиктин символун эстечи?

- Ии, баса. Ак шумкарды айтпай кеткен турбайынбы.

б) Ырды жаттап алгыла

Герб

Жери, тоосу, көлү бар,

Малдуу  жашыл төрү бар.

Кандай көркөм мекениң –

Гербден карап көрүп ал.

Алтын даны гүлзары,

Көзгө тааныш бүт баары.

Канаттууга кактырбас,

Турат алгыр шумкары.

“Биздин Герб” – деп кубанып,

Сыймыктанып жүрөбүз.

Бул – мекендин көөнөргүс,

Белгиси - деп билебиз.

Абзий  Кыдыров

(Кыргыз акын-жазуучулары – балдарга, 1-китеп, Бишкек, 2008, 207-бет)