Сары барпы деп аталган канаттууну көрдүңөр беле? Чоңдугу чөкө таандай. Жүнү негизинен сапсары келип, июль айында толук ачылып, гүлдөп турган күн караманын таажысына окшош. Ырас, короздору гана сапсары болушат. Ургаачылары бозураак, тулку бою да муштумдан кичирээк.
Эгерде силер жашаган тарапта өзөн суу бойлоп мажүрүмтал өссө, анда сары барпыны ошол жерден көрүүнөр мүмкүн. Себеби, бул канаттуулар апрель айында түштүк тараптан учуп келип, уясын ошол талдын калың бутактарынын арасына салат. Топтоголок уясын жиптей ичке бутактардын учуна «байлап, чырмап» жасагандыктан, ага эч бир ит-куш да жете албайт. Чаң учурган катуу шамал да уясын жерге кулата албайт. Анткени, ал жыгачтын кайыштай бекем кабыгы менен өрүмдөлүп токулат. Сары барпынын мындай амалын, айлакердигин көргөн адам баласы таң калбай койбойт.