«Эрменди жемек тургай, улагымды көтөрө албай араң жүрөм», - деди эчки.  «Сени карышкырга айтып, жегизем», - деп торгой учкан бойдон карышкырга барды. «Карышкыр, карышкыр, төмөн жакта бир эчки турат, жесең боло».  «Эчки жемек түгүл, үңкүрүмдү каза албай жатам», - деп жооп берди карышкыр.  «Сени жылкычыга барып айтайын, азыр чаап алсын» - деди да, торгой сызган бойдон жылкычыга жетти.  «Жылкычы, жылкычы, төмөнкү коктуда бир карышкыр үңкүр казып жатат, чаап алсаң боло».  «Карышкыр чапмак түгүл, жоголгон жылкымды  табалбай жүрөм», - деп жылкычы сүйлөдү. «Сени  байга  айтпасамбы», - деди торгой, анан байга келди.  «Бай, бай, жылкычың жылкыларды жоготуп таппай жүрөт, аны урсаң боло».  «Жылкычыны урмак түгүл, казымды көтөрүп басалбай отурам», - деди бай.

    «Сени чычканга айтып, казыңды тештирейин», - деп торгой чычканга келди. «Байдын казысын тешмек түгүл, балдарыма ийин каза албай жатам», - деп чычкан чыйылдады. «Сени тентек балдарга  айтып ийниңе суу куйдурбасамбы» - деп торгой, кекенген бойдон тентектерге айтты: «Ийинисине суу куймак түгүл, балдарга чүкөмдү уттуруп, музоомду кайтара албай жүрөм», - дейт тентек бала. «Сени энеңе айтпасамбы», - деди да, торгой баланын энесине учуп кетти: «Балаң чүкөсүн уттуруп, музоосун карабайт экен, сабасаң боло».  «Аны сабамак тургай, жүн сабай албай жатам», - деди энеси. «Сени куюнга айтып, жүнүңдү  учуртайын» - деди да, торгой куюн­га барып айтты. Куюндун колу жолу бош экен, макул болду. Куюн кокту ылдый келип кемпирдин жүнүн учурду, кемпир баласын урду, баласы чычкандын ий­нине суу куйду, чычкан чыга калып, байдын курсагын тырмады, бай жылкычысын урду, жылкычы карышкырды кууду, карышкыр кара эчкини кууду, эчки эрменди жеп, торгойдун топусун алып берди. Ошондон кийин тор­гой топусун башынан түшүрбөй дайыма баса кийип жүрүүчү болуптур.