а) Сөз айкаштарын  эки тилде окуп өздөштүрүп алгыла

в) Текстти  окугула, бири-бириңерге аңгемелеп бергиле

Жайлоодогу тиричилик

       Жайлоодогу тиричилик таң ата электе башталат. Эртең менен эрте, күн чыга электе чоң атам жылкыларды айдап келгени кетет. Жылкылар келгенче чоң энем уйларды саап, очокко от жагып, сүттү бышырып, айранды уютуп, самоорго чайын коюп, анан бизди ойготот. Мен, Ырыскелди, Мырза үчөөбүздүн дагы өз милдетибиз бар. Чоң атам жылкыларды айдап келгенден кийин биз кулундарды желеге байлашабыз. Жеңем бээлерди саап берет. Биз бээнин сүтүн сабаага алып барып куюп, кезек-кезеги менен аны бышабыз. Ага чейин чоң энем бизге эртең мененки тамагын дасторконго коюп, даярдап турган болот. Баарыбыз отуруп ысык сүт, самоордун чайын ичип, нан менен каймак жейбиз. Эртең мененки тамактан кийин байкем атын минип, койлорун айдап жайытка кетет. Албетте, биз дагы кезеги менен кой кайтарышканга жардам беребиз.

      Чоң энем баштыкка сүзмө куят. Даяр болгондо жеңеме курут жайышканы жардам беребиз. Көпчүлүк учурда Мырза менен Ырыскелди тезек теришип, кургатышат. Мен болсо очокко от жагып, жеңеме нан жапканга жардам бергенди жакшы көрөм. Сабаадагы даяр болгон кымыздарды чаначтарга куюп коёбуз, анткени чаначта кымыз жакшы сакталат экен. Кечинде уйларды жайыттан айдап келебиз, чоң энем саайт. Бээлер беш маал саалгандан кийин кечке жуук аларды кулундары менен кошо жайытты көздөй айдап жиберебиз. Жайлоодогу тиричилик кызыктуу жана түйшүктүү. Бирок биз жыл сайын жайкы каникулду жайлоодон өткөрөбүз.